Num 34 | ZomZIV | STEP | TOPA in Moses tungah,

Numbers 34

Canaan Gamgite

1 TOPA in Moses tungah, 2 “Israel-te thu pia inla, amaute kiangah, ‘Note luah dinga hong kipia Canaan gamah na lut uh ciangin hih bangin gamgi na nei ding uh hi. ^a

3 “‘Na leitaw-lam pang uh Edom gamgi dunga Zin Sehnel-gam khenkhat a kihel ding hi. A nisuahna lam ah na leitaw-lam gamgi uh Ci Tuipi c mong panin kipan dinga, 4 Mom-ai d Cianggek leitaw-lam kantanin Zin dong kizomsuakin Kadesh Barnea leitaw lamah a pai ding hi. Tua ciangin Hazar Addar ah pai-in Azmon dong kizomsuakin 5 tua lai-ah Egypt Wadi zomin Tuipi e a mong hi ding hi.

6 “‘Na nitumna-lam gamgi uh Tuipi Lian gei dungdung hi ding hi. Hih in nitumna lama na gamgi uh hi ding hi.

7 “‘Leilu lama na gamgi uh Tuipi Lian pan Hor Vum dong, 8 Hor Vum pan Lebo f Hamath dong kikhung ding hi. Tua ciangin Zedad dong gamgi pai dinga 9 Ziphron dong kizomin a mong Hazar Enan hi ding hi. Hih in leilu lama na gamgi ding uh ahi hi. ^b

10 “‘Nisuahna lama na gamgi ding uh, Hazar Enan panin Shepham dong kikhung ding hi. 11 Shepham pen Riblah dong Ain nisuahna-lam pangah paisuk dinga Kinnereth g Tuipi nisuahna-lam dungah sawi zopsuk ding hi. 12 Tua ciangin gamgi Jordan dungah paisukin Ci Tuipi a mong hi ding hi. ^c

“‘Hih gamgi huamkhak sung teng no gam ding ahi hi,’ ci-in gen in,” a ci hi.

13 Moses in Israel-te kiangah, “Hih leitang a luah dingte aisan un. TOPA in beh kua le a langte piak dinga thu a piaksa ahi hi, 14 bang hang hiam cih leh Reuben-te beh le a innkuante, Gad-te beh le Manasseh-te beh alangte in amau luah ding ngah khin uh hi. 15 Hih beh nih le a langte in Jericho a a Jordan nisuahna lampang, nisuah-khiatna mun lam a luah dingun ngah khin uh hi,” ci-in thu a pia hi. ^d

16 TOPA in Moses kiangah, 17 “Hihte in note luah ding gam hong hawmsak dingte min ahi hi: Siampi Eleazer le Nun tapa Joshua. 18 Gam hawm huh dingin beh khat panin makai khat na sehkhia ding uh hi. 19 Amau minte in: ^e

Judah beh panin,
Jephunneh tapa Caleb;
20 Simeon beh panin,
Ammihud tapa Shenuel;
21 Benjamin beh panin,
Kislon tapa Elidad;
22 Dan beh panin,
a makai Jogli tapa Bukki;
23 Joseph tapa Manasseh beh panin,
a makai Ephod tapa Hanniel;
24 Joseph tapa Ephraim beh panin
a makai Shiphtan tapa Kemuel;
25 Jebulun beh panin a makai
Parnach tapa Elizaphan;
26 Issachar beh panin,
a makai Azzan tapa Patiel;
27 Asher beh panin,
a makai Shelomi tapa Ahihud; ^f
28 Naphtali beh panin,
a makai Ammihud tapa Pedahel,” te ahi uh hi.

29 Canaan gama luah ding leitang hawm dinga TOPA thupiaksate hih mite ahi uh hi.